Dagatal 2020
Bloggið okkar hefur aðeins fengið að víkja fyrir fljótlegri færslum á samfélagsmiðlum síðustu mánuði, en það skrifast helst á nýjasta fjölskyldumeðliminn, hann Kolbein Búra draumadreng.
Við erum þó að reyna að taka okkur saman og vera virk fyrir jólin, en við ákváðum að bjóða dagatalið okkar til sölu í ár. Fjölskylda og vinir hafa undanfarin ár fengið heimagert dagatal frá okkur og eftir síðustu jól vorum við hvött til að bjóða það til sölu.
Þetta er samstarfsverkefni okkar skötuhjúa, húsfreyjan hannar dagatalið en húsbóndinn býr til standana. Spjöldin eru úr veglegum pappír í stærð A5 og standarnir eru handunnir úr eik. Mjög skemmtilegt verkefni og kemur vel út að okkar mati.
Það skemmir ekki fyrir að standarnir eru úr eik sem er afgangs og færi annars til spillis.
Plastlaus og falleg gjöf, sem hægt er að panta hér á síðunni, í gegnum Facebook síðuna okkar eða Instagram.
Jólin leggjast annars vel í okkur hér við lækinn, en planið er að halda okkar fyrstu jól í húsinu okkar. Síðustu jól höfum við flúið eitthvert annað þar sem ekki er hægt að halda jól án eldhúss. En núna erum við bæði með eldhús og stofu og verður yndislegt að halda okkar fyrstu jól hérna sem fjögurra manna fjölskylda.
Húsið okkar er þó ekki tilbúið en alveg nóg til að fari vel um okkur. Það eru því engar kröfur hér um fullkomin jól, bara að hafa það notalegt og muna að þetta er hátíð barnanna.
Bestu jólakveðjur frá fjölskyldunni við lækinn!